1ܡܗܘܼܡܸܢܬܵܐ ܝَܠܵܗ̇ ܗܹܡܸܙܡܵܢ؛ ܕܐܸܢ ܐ݇ܢܵܫܵܐ ܫܲܗ݇ܘܸܬ ܠܐܲܦܸܣܩܘܿܦܘܼܬܵܐ؛ ܠܦܘܼܠܚܵܢܵܐ ܛܵܒܼܵܐ ܫܲܗ݇ܘܘܼܬܹܐ ܝܠܹܗ. 2ܒܲܣ ܘܵܓ̰ܸܒ ܝܼܠܵܗ̇ ܕܗܵܘܹܐ ܐܲܦܸܣܩܘܿܦܵܐ ܕܠܵܐ ܡܘܼܡܵܐ؛ ܘܗܵܘܹܐ ܓܲܒܼܪܵܐ ܕܚܕܵܐ ܒܲܟܼܬܵܐ؛ ܪܥܝܼܫܵܐ ܒܚܝܼܵܠܹܗ؛ ܨܵܠܝܼܠܵܐ؛ ܡܵܪܹܐ ܪܹܐܙܵܐ؛ ܡܲܚܸܒܵܢܵܐ ܕܢܘܼܟܼܪ̈ܵܝܹܐ؛ ܘܡܲܠܦܵܢܵܐ؛ 3ܘܠܵܐ ܐܵܙܵܠ݇ܢܵܐ ܒܵܬ݇ܪ ܚܲܡܪܵܐ؛ ܘܠܵܐ ܡܵܚܝܵܢܵܐ؛ ܐܸܠܵܐ ܗܵܘܹܐ ܡܵܟܝܼܟܼܵܐ؛ ܘܠܵܐ ܡܲܩܪܸܨܵܢܵܐ؛ ܘܠܵܐ ܡܲܚܸܒܵܢܵܐ ܕܙܘܼܙܵܐ؛ 4ܘܬܲܓܒܸܪܵܢܵܐ ܕܒܲܝܬܹܗ ܨܦܵܝܝܼ؛ ܘܕܒܼܝܼܩܵܐ ܝܵܠܕَܘܼ̈ܗܝ ܒܙܲܒܛܘܼܬܵܐ ܒܟܠܵܗ̇ ܝܵܩܘܿܪܘܼܬܵܐ. 5ܣܵܒܵܒ ܐܸܢ ܒܲܝܬܵܐ ܕܓܵܢܹܗ ܠܵܐ ܝܲܕܸܥ ܠܬܲܓܒܘܼܪܹܐ؛ ܕܵܐܟܼܝܼ ܒܸܬ ܬܲܓܒܸܪ ܠܥܹܕܬܹܗ ܕܐܲܠܵܗܵܐ؛ 6ܘܠܵܐ ܗܵܘܹܐ ܬܵܙܵܐ ܕܝܼܪܵܐ؛ ܕܠܵܐ ܦܵܝܸܫ ܡܘܼܪܡܵܐ ܘܢܵܦܸܠ ܒܕܝܼܘܵܢܹܗ ܕܐܵܟܼܠܩܲܪܨܵܐ. 7ܐܝܼܢܵܐ ܘܵܓ̰ܸܒ ܝܼܠܵܗ̇ ܕܐܘܼܦ ܣܵܗܕܘܼܬܵܐ ܨܦܵܝܝܼ ܗܵܘܝܵܐ ܠܹܗ ܡ̣ܢ ܒܲܪ̈ܵܝܹܐ؛ ܕܠܵܐ ܢܵܦܸܠ ܒܠܵܘܡܵܐ ܘܒܢܸܫܒܹ̈ܐ ܕܐܵܟܼܹܠܩܲܪܨܵܐ. 8ܘܐܘܼܦ ܫܵܡܵܫܹ̈ܐ ܗܲܕܟܼܵܐ ܗܵܘܝܼ ܝܵܩܘܿܪܹ̈ܐ؛ ܘܠܵܐ ܗܲܡܙܸܡܵܢܹ̈ܐ ܬܪ̈ܲܝ؛ ܘܠܵܐ ܩܵܠܒܵܢܹ̈ܐ ܠܚܲܡܪܵܐ ܪܵܒܵܐ؛ ܘܠܵܐ ܡܲܚܸܒܵܢܹ̈ܐ ܕܩܢܵܝܬܵܐ ܟ̰ܲܦܵܠ؛ 9ܐܸܠܵܐ ܕܵܒܼܩܵܢܹ̈ܐ ܕܣܸܪ ܕܗܲܝܡܵܢܘܼܬܵܐ ܒܐܸܢܝܲܬ ܕܟܼܝܼܬܵܐ. 10ܘܗܲܪ ܐܵܢܝܼ ܩܵܕ݇ܡܵܝܬܵܐ ܦܵܝܫܝܼ ܨܘܼܚܨܝܼܹܐ؛ ܘܗ̇ܝܓܵܗ ܥܵܒܼܕܝܼ ܫܵܡܵܫܘܼܬܵܐ؛ ܐܸܢ ܕܠܵܐ ܡܘܼܡܵܐ ܝܢܵܐ. 11ܗܲܕܟܼܵܐ ܐܘܼܦ ܒܲܟܼܬܵܬܹ̈ܐ ܗܵܘܝܼ ܝܵܩܘܿܪܹ̈ܐ؛ ܠܵܐ ܥܵܒܼܕܵܢܹ̈ܐ ܕܩܲܝܒܲܬ؛ ܪ̈ܥܝܼܫܹܐ ܒܚܝܼܵܠܵܝ؛ ܘܡܗܘܼܡܢܹ̈ܐ ܒܟܠ ܡܸܢܕܝܼ. 12ܫܵܡܵܫܹ̈ܐ ܗܵܘܝܼ ܗ̇ܘ ܕܗܵܘܝܵܐ ܠܹܗ ܚܕܵܐ ܒܲܟܼܬܵܐ؛ ܘܬܲܓܒܘܼܪܹܐ ܝܵܠܕَܘܼ̈ܗܝ ܘܒܲܝܬܘܼܗܝ ܨܦܵܝܝܼ. 13ܣܵܒܵܒ ܐܵܢܝܼ ܕܥܵܒܼܕܝܼ ܫܵܡܵܫܘܼܬܵܐ ܫܵܦܝܼܪܬܵܐ؛ ܕܲܪܓܼܵܐ ܛܵܒܼܵܐ ܟܹܐ ܩܵܢܝܼ ܠܓܵܢܵܝ؛ ܘܚܘܵܪܦܵܬܘܼܬܵܐ ܪܵܒܵܐ ܒܗܲܝܡܵܢܘܼܬܵܐ ܕܒܝܼܫܘܿܥ ܡܫܝܼܚܵܐ. 14ܐܲܢܹܐ ܒܸܟܬܵܒܼܵܐ ܝܘܸܢ ܐܸܠܘܼܟܼܼ؛ ܟܲܕ ܒܗܹܒܼܝܼ ܝܘܸܢ ܕܓ̰ܲܠܕܹܐ ܐܵܬܹܢ ܠܟܸܣܠܘܼܟܼܼ؛ 15ܘܐܸܢ ܥܲܪܩܸܠܸܢ؛ ܕܝܲܕܥܸܬ ܕܵܐܟܼܝܼ ܘܵܓ̰ܸܒ ܝܼܠܵܗ̇ ܠܸܚܕܵܪܵܐ ܓܵܘ ܒܲܝܬܹܗ ܕܐܲܠܵܗܵܐ؛ ܕܝܼܠܵܗ̇ ܥܹܕܬܵܐ ܕܐܲܠܵܗܵܐ ܚܲܝܵܐ؛ ܣܛܘܼܢܵܐ ܘܒܸܢܝܲܬ ܕܣܲܪܲܣܬܘܼܬܵܐ. 16ܘܒܬܪܘܼܨܬܵܐ ܓܘܼܪܵܐ ܝܠܹܗ ܐܵܗܵܐ ܣܸܪ ܕܕܸܚܠܲܬ ܐܲܠܵܗܵܐ؛ ܕܦܸܫܠܹܗ ܓܸܠܝܵܐ ܐܲܠܵܗܵܐ ܒܒܸܣܪܵܐ؛ ܘܦܸܫܠܹܗ ܡܘܼܟܫܸܛܵܐ ܒܪܘܼܚܵܐ؛ ܘܦܸܫܠܹܗ ܚܸܙܝܵܐ ܠܡܲܠܲܐܟܼܹ̈ܐ؛ ܘܦܸܫܠܹܗ ܡܘܼܟܪܸܙܵܐ ܓܵܘ ܛܵܝܸܦܹ̈ܐ؛ ܘܦܸܫܠܹܗ ܗܘܼܡܸܢܵܐ ܓܵܘ ܥܵܠܡܵܐ؛ ܘܦܸܫܠܹܗ ܡܘܼܣܩܵܐ ܒܚܸܩܪܵܐ.